پاکستان کرکٹ بورڈ اور بھارتی کرکٹ بورڈ کے درمیان ورلڈ کپ میچ کے مقام کے حوالے سے معاہدہ طے پا گیا ہے۔
روزنامہ دینک جاگرن کی ایک رپورٹ کے مطابق پاکستان نے اب بھارت کے شہر احمد آباد کے نریندر مودی اسٹیڈیم میں اپنے روایتی حریف کے خلاف کھیلنے پر رضامندی ظاہر کردی ہے۔
ابتدائی طور پر پاکستان نے سیکیورٹی وجوہات کی بنا پر احمد آباد میں کھیلنے پر تشویش کا اظہار کیا تھا، تاہم بی سی سی آئی اور پی سی بی کے درمیان بات چیت کے بعد ایک حل نکالا گیا ہے۔
یہ فیصلہ بی سی سی آئی کی جانب سے ایشیا کپ کے لیے پی سی بی کے مجوزہ ہائبرڈ ماڈل کو قبول کرنے پر رضامندی کے بعد سامنے آیا ہے۔
پی سی بی کی جانب سے تجویز کردہ ہائبرڈ ماڈل کے مطابق ٹورنامنٹ کے ابتدائی مرحلے میں گروپ مرحلے کے ابتدائی چار میچز پاکستان کے شہر لاہور میں کھیلے جائیں گے۔
اس کے بعد کے مرحلے میں بھارت کے میچ اور فائنل سری لنکا میں کھیلے جائیں گے، یہ سمجھوتہ دونوں ممالک کو میچوں کی میزبانی کرنے اور پاکستان کی جانب سے اٹھائے گئے سیکیورٹی خدشات کو دور کرنے کی اجازت دیتا ہے۔
پی سی بی نے اس سے قبل دھمکی دی تھی کہ اگر ان کے ہائبرڈ ماڈل کو قبول نہیں کیا گیا تو وہ ایشیا کپ اور اس کے بعد بھارت میں ہونے والے ون ڈے ورلڈ کپ کا بائیکاٹ کرے گا۔
ان خدشات کو دور کرنے کے لیے آئی سی سی کے چیئرمین گریگ بارکلے اور سی ای او جیف ایلرڈائس سمیت حکام نے لاہور کا دورہ کیا اور پی سی بی حکام سے ملاقاتیں کیں تاکہ اس بات کی ضمانت حاصل کی جاسکے کہ پاکستانی ٹیم 2023 ورلڈ کپ کے لیے بھارت کا دورہ کرے گی۔
اس گارنٹی کی روشنی میں بی سی سی آئی نے پی سی بی کے مجوزہ ہائبرڈ ماڈل کو قبول کرنے کا فیصلہ کیا اور بھارت اور پاکستان کے درمیان ورلڈ کپ میچ احمد آباد میں کرانے پر رضامندی ظاہر کی۔
یہ میچ بہت اہمیت کا حامل ہے کیونکہ 2016 کے بعد یہ پہلا موقع ہے جب دونوں حریف ممالک ہندوستانی سرزمین پر آمنے سامنے ہوں گے۔
بی سی سی آئی نے احمد آباد کے نریندر مودی اسٹیڈیم کو اس انتہائی سخت میچ کے مقام کے طور پر منتخب کرنے کا فیصلہ اس توقع کی وجہ سے کیا ہے کہ بڑی تعداد میں بین الاقوامی شائقین ایونٹ کے لئے ہندوستان کا دورہ کریں گے، ایک لاکھ تماشائیوں کے بیٹھنے کی گنجائش والا نریندر مودی اسٹیڈیم ملک کا سب سے بڑا کرکٹ اسٹیڈیم ہے۔
بی سی سی آئی پہلے ہی ورلڈ کپ کا شیڈول آئی سی سی کو بھیج چکا ہے اور توقع ہے کہ اسے بدھ تک جاری کردیا جائے گا۔
دنیا بھر کے کرکٹ شائقین بھارت اور پاکستان کے درمیان ہونے والے اس ہائی پروفائل میچ کا بے صبری سے انتظار کر رہے ہیں، جو ایک سنسنی خیز مقابلہ ہوگا جس میں دونوں کرکٹ ممالک کے درمیان شدید رقابت کو ظاہر کیا جائے گا۔
