وینزویلا (ویب ڈیسک): وینزویلا کے صدارتی الیکشن میں صدر نکولس مادورو نے تیسری مرتبہ اکامیابی حاصل کرلی۔غیر ملکی میڈیا کے مطابق وینزویلا کی الیکٹورل اتھارٹی کا کہنا ہے کہ الیکشن کے 80 فیصد نتائج سامنے آچکے ہیں جس میں صدر نکولس نے 51.20 فیصد ووٹ حاصل کیے ہیں جب کہ ان کے مدمقابل کو 44.02 فیصد ووٹ ملے۔دوسری جانب وینزویلا کی مرکزی اپوزیشن نے الیکشن کے نتائج کو بڑے پیمانے پر فراڈ قرار دیتے ہوئے اسے چیلنج کرنے کا اعلان کیا ہے۔
وینزویلا میں صدر نکولس کے 11 سالہ اقتدار کو ختم کرنے کے لیے اپوزیشن کی جانب سے ایڈمنڈو گونزالیز کو مشترکہ امیدوار نامزد کیا گیا تھا۔
الیکشن نتائج سامنے آنے کے بعد اپنے سپورٹرز سے خطاب میں صدر نکلوس نے کہا کہ ان کا ایک بار پھر الیکشن میں کامیاب ہونا امن و استحکام کی فتح ہے۔
صدر نکولس نے ملک کے الیکشن سسٹم کی تعریف کرتے ہوئے کہا کہ الیکشن انتہائی شفاف تھے جب کہ انہوں نے اپوزیشن کو آڑے ہاتھوں لیتے ہوئے اسے روتے ہوئے فراڈیے قرار دیا۔
ادھر امریکی وزیر خارجہ نے الیکشن نتائج پر شکوک و شبہات کا اظہار کیا اور کہا کہ امریکا کو الیکشن کے نتائج پر شدید تشویش ہے، یہ نتائج وینزویلا کے عوام کی امنگوں کی عکاسی نہیں کرتے۔
تاہم صدر نکولس کی حکومت کے قریبی اتحادی کیوبا نے الیکشن نتائج پر کہا ہےکہ عوام نے بتایا کہ انقلاب جیت چکا ہے۔
میڈیا رپورٹس کے مطابق وینزویلا کی اپوزیشن نے ووٹوں کی گنتی کے دوران اپنے ہزاروں افراد کو پولنگ اسٹینشز پر تعینات کیا تھا تاکہ وہ اپنے ووٹ کاؤنٹ پر خود بھی نظر رکھ سکیں۔
تاہم اپوزیشن امیدوار کے ترجمان نے کہا کہ ملک کے متعدد پولنگ اسٹیشنز سے ان کے لوگوں کو زبردستی ہٹادیا گیا تھا۔
