(ویب ڈیسک): آئی سی سی مینز ٹی ٹوئنٹی ورلڈکپ میں سپر 8 مرحلے کے اہم میچ میں بھارت نے آسٹریلیا کو شکست دے کر سیمی فائنل کے لیے کوالیفائی کرلیا۔بھارت کے 206 رنز کے ہدف کے تعاقب میں آسٹریلوی ٹیم 181 رنز بناسکی اور اسے 24 رنز سے شکست کا سامنا کرنا پڑا۔ اس ہار کے بعد کینگروز کا سیمی فائنل میں پہنچنے کا سفر کافی مشکل ہوگیا۔
آسٹریلوی ٹیم کو اب گروپ 1 میں بنگلادیش اور افغانستان کے میچ میں افغان ٹیم کی کم مارجن سے شکست کا انتظار کرنا ہے۔
سینٹ لوشیا میں کھیلے گئے میچ میں آسٹریلوی کپتان مچل مارش نے ٹاس جیت کر بھارت کو پہلے بیٹنگ کی دعوت دی۔
بھارت کی ٹیم میں کوئی تبدیلی نہیں کی گئی جبکہ آسٹریلیا اپنے تجربہ کار بولر مچل اسٹارک کو واپس لایا۔
بھارت کی اننگز
ٹی 20 ورلڈکپ: بھارت نے آسٹریلیا کو شکست دیکر سیمی فائنل کیلئے کوالیفائی کرلیا
آسٹریلیا کے خلاف بھارت کا آغاز اچھا نہ تھا، تجربہ کار بیٹر ویرات کوہلی صفر پر ہی آؤٹ ہوگئے۔
ایک وکٹ گرنے کے بعد کپتان روہت شرما نے آسٹریلوی بولرز کا بھرکس نکالا اور میدان کے چاروں اطراف دلکش اسٹروکس لگاتے رہے۔انہوں نے 41 گیندوں پر 92 رنز کی دھواں دار اننگز کھیلی جس میں 8 چھکے اور 7 چوکے شامل تھے۔
اس کے علاوہ رشبھ پنت 15، سوریا کمار یادیو 31 اور شیوم دوبے 28 رنز بناکر آؤٹ ہوئے جبکہ ہاردک پانڈیا 27اور جڈیجا 9 رنز بناکر ناٹ آؤٹ رہے۔
بھارت نے مقررہ 20 اوورز میں 5 وکٹوں کے نقصان پر 205 رنز اسکور کیے۔
آسٹریلیا کی جانب سے مارکس اسٹوئنس اور مچل اسٹارک نے 2،2 وکٹیں حاصل کیں۔
آسٹریلیا کی اننگز
ٹی 20 ورلڈکپ: بھارت نے آسٹریلیا کو شکست دیکر سیمی فائنل کیلئے کوالیفائی کرلیا
بھارت کے 206 رنز کے ہدف کے تعاقب میں کینگروز کا آغاز اچھا نہ تھا،ڈیوڈ وارنر 6 رنز بناکر آؤٹ ہوئے۔
ایک وکٹ گرنے کے بعد ٹریوس ہیڈ اور کپتان مچل مارش نے جارجانہ اننگز کھیلی اور آسٹریلیا کو جیت کی امید دلوائی لیکن پھر مارش 37 رنز بناکر پویلین لوٹے۔
اس کے علاوہ گلین میکسویل 20 رنز بناکر ٹیم کا ساتھ چھوڑ گئے، ایسے میں ٹریوس ہیڈ نے جارحانہ اننگز کو جاری رکھا اور نصف سنچری مکمل کی لیکن پھر وہ بھی 76 رنز بناکر آؤٹ ہوگئے۔
مارکس اسٹوئنس نے 2،ٹم ڈیوڈ 15 اور میتھو ویڈ ایک رن بناسکے۔
یوں آسٹریلیا کی ٹیم ہدف کے تعاقب میں 7 وکٹوں کے نقصان پر 181 رنز بناسکی۔ اس جیت کے ساتھ ایونٹ میں ناقابل شکست رہنے والی بھارتی ٹیم گروپ 1 سے سیمی فائنل میں پہنچ گئی۔
گروپ 2 سے انگلینڈ اور جنوبی افریقا پہلے ہی سیمی فائنل کیلئے کوالیفائی کرچکے ہیں۔
بھارت 27 جون کو انگلینڈ کے خلاف سیمی فائنل کھیلے گا۔
گروپ 1 کی صورتحال
اس وقت بھارت گروپ 1 میں 3 میچز میں کامیابی کے ساتھ 6 پوائنٹس کے ساتھ پہلے نمبر پر موجود ہے۔
آسٹریلیا 3 میچز میں ایک میچ جیت کر 2 پوائنٹس کے ساتھ دوسرے جبکہ افغانستان 2 میچز میں ایک میں کامیابی حاصل کر کے 2 پوائنٹس کے ساتھ تیسرے نمبر پر موجود ہے۔
گروپ 1 سے دوسری سیمی فائنلسٹ ٹیم کا فیصلہ افغانستان اور بنگلادیش کے درمیان میچ کے بعد ہوگا، آسٹریلیا، افغانستان اور بنگلادیش تینوں سیمی فائنل کی دوڑ میں اب تک شامل ہیں۔
افغانستان کے لیے اگلے مرحلے میں پہنچنے کے لیے آسان راستہ ہے کہ وہ بنگلادیش کو شکست دے اور سیمی فائنل کیلئے کوالیفائی کرلے جبکہ اس کی ہار کی صورت میں تینوں ٹیموں کے درمیان معاملہ نیٹ رن ریٹ پر جائے گا۔
