پاکستان کرکٹ بورڈ قومی کرکٹ ٹیم کو دباؤ سے نمٹنے میں مدد کے لیے ماہر نفسیات کی تقرری پر غور کر رہا ہے کیونکہ آئندہ ون ڈے ورلڈ کپ 2023 اکتوبر-نومبر کے آخر میں بھارت میں ہوگا۔
پی سی بی حکام کا ماننا ہے کہ زیادہ تر کھلاڑی پہلی بار بھارت میں کھیلیں گے، پاکستان کرکٹ ٹیم کی شرکت کا فیصلہ ایک اعلیٰ سطحی حکومتی کمیٹی کرے گی جس کا پہلا اجلاس جمعرات کو ہوا۔
پی سی بی (پاکستان کرکٹ بورڈ) کو چینلز کے ذریعے مثبت سگنل موصول ہوئے ہیں۔ سیکورٹی کلیئرنس ملنے کے بعد ٹیم سرحد پار سفر کرے گی، موجودہ صورتحال کا جائزہ لینے کے لئے ایک وفد بھیجنے کا بھی امکان ہے۔
بورڈ نے پہلے ہی ایونٹ کے لئے منصوبہ بندی شروع کردی ہے۔ موجودہ اسکواڈ کے زیادہ تر ارکان نے اس سے پہلے کبھی ہندوستان میں کرکٹ نہیں کھیلی ہے، اور حکام کا ماننا ہے کہ میڈیا کی تشہیر اور عوامی توقعات کھلاڑیوں پر دباؤ ڈال سکتی ہیں۔
لہٰذا ماہر نفسیات کی تقرری پر سنجیدگی سے غور کیا جا رہا ہے۔ وہ اسکواڈ کے ساتھ ہمسایہ ملک جائیں گے اور اہم لمحات میں کھلاڑیوں کے حوصلے بلند کرنے میں مدد کریں گے اور انہیں کسی بھی خوف سے محفوظ رکھیں گے۔
اگرچہ ابھی تک اس کردار کے لئے کسی کو حتمی شکل نہیں دی گئی ہے ، لیکن آپشنز پر غور کیا جارہا ہے۔ یہ بھی ممکن ہے کہ ٹیم کی روانگی سے قبل سیشن منعقد کیے جائیں۔
ذرائع کا مزید کہنا ہے کہ چیئرمین پی سی بی مینجمنٹ کمیٹی ذکا اشرف کھلاڑیوں کے ساتھ خوشگوار تعلقات برقرار رکھنے کے لیے پرعزم ہیں۔
انہوں نے سینٹرل کنٹریکٹ کے حوالے سے متعلقہ حکام کو مشورہ دیا ہے کہ وہ اس معاملے کو خوش اسلوبی سے حل کریں۔ یہی وجہ ہے کہ تنخواہوں میں خاطر خواہ اضافے کی تجویز دی گئی ہے۔
سری لنکا سے واپسی پر اشرف کپتان بابر اعظم سے بھی ملاقات کریں گے اور ٹیم مینجمنٹ کے معاملات پر ان کی رائے حاصل کریں گے۔
یاد رہے کہ 2012 میں جب پاکستان کرکٹ ٹیم نے آخری دو طرفہ سیریز کے لیے بھارت کا دورہ کیا تھا تو اس وقت اسپورٹس سائیکولوجسٹ مقبول بابری ٹیم کے ہمراہ تھے، اس وقت ذکا اشرف پی سی بی کے چیئرمین تھے۔
پی سی بی نے پہلی بار مقبول کو محمد عامر کے کونسلنگ سیشنز کے لیے اسپورٹس سائیکولوجسٹ مقرر کیا تھا۔
سلمان بٹ اور محمد آصف کے ساتھ 2010 کے اسپاٹ فکسنگ اسکینڈل میں ملوث عامر پاکستان واپس آنے سے قبل برطانیہ میں قید کی سزا کاٹ چکے ہیں۔
2012 میں پاکستان اور بھارت کے درمیان ٹی 20 سیریز ڈرا (1-1) پر ختم ہوئی جبکہ پاکستان نے ون ڈے سیریز (2-1) سے جیت ی۔
اس وقت گرین شرٹس کا دورہ 5 سال کے وقفے کے بعد ہوا تھا اور کئی کھلاڑی پہلی بار بھارتی سرزمین پر ایکشن میں نظر آئے تھے۔
2016 کے ٹی ٹوئنٹی ورلڈ کپ میں گرین شرٹس (پاکستان کرکٹ ٹیم) نے بھی شرکت کے لیے بھارت کا دورہ کیا تھا لیکن سیمی فائنل میں پہنچنے سے قبل ہی ان کا سفر ختم ہو گیا تھا۔
ون ڈے ورلڈ کپ میں روایتی حریف پاکستان اور بھارت 15 اکتوبر کو آمنے سامنے ہوں گے۔ تاہم شیڈول میں تبدیلی کی وجہ سے اب میچ ایک دن پہلے ہوگا۔
