احمد آباد کے نریندر مودی اسٹیڈیم میں رواں سال اکتوبر نومبر میں آئی سی سی 50 اوورز کے ورلڈ کپ میں پاکستان اور بھارت کے درمیان میچ کھیلا جائے گا۔
2016 کے بعد یہ پہلا موقع ہوگا جب دونوں روایتی حریف ہندوستانی سرزمین پر آمنے سامنے ہوں گے۔
ایک لاکھ افراد کے بیٹھنے کی گنجائش والا یہ اسٹیڈیم بھارت کا سب سے بڑا اسٹیڈیم ہے اور اس کا انتخاب اس توقع کے پیش نظر کیا گیا ہے کہ شائقین کی بڑی تعداد میچ کے لیے بیرون ملک سے سفر کرے گی۔
آئی پی ایل کے اختتام کے بعد بی سی سی آئی ورلڈ کپ کے شیڈول کا اعلان کرے گا، ٹورنامنٹ کا آغاز 5 اکتوبر سے ہوگا جس میں ناگپور، بنگلورو، تریوندرم، ممبئی، دہلی، لکھنؤ، گوہاٹی، حیدرآباد، کولکتہ، راجکوٹ، اندور، بنگلورو اور دھرم شالا کے مقامات کو میچوں کے لیے شارٹ لسٹ کیا گیا ہے۔
تاہم، صرف سات مقامات ہندوستان کے لیگ میچوں کی میزبانی کریں گے، احمد آباد واحد مقام ہے جہاں بھارت دو میچ کھیل سکتا ہے، بشرطیکہ ٹیم فائنل میں جگہ بنائے، پاکستان اور بنگلہ دیش اپنے زیادہ تر میچ بالترتیب چنئی، بنگلور، گوہاٹی اور کولکتہ میں کھیل سکتے ہیں۔
بی سی سی آئی نے بھارتی ٹیم انتظامیہ سے مشورہ کیا ہے تاکہ پاکستان کے ساتھ میچ کے علاوہ میچوں کے لئے ان کی ترجیحات معلوم کی جا سکیں۔
ٹیم نے بی سی سی آئی سے درخواست کی ہے کہ وہ آسٹریلیا، انگلینڈ، نیوزی لینڈ اور جنوبی افریقہ کے خلاف میچوں کو اسپنرز کی مدد کرنے والے مقامات پر مختص کرے، کیونکہ وہ اپنے گھریلو فائدے کے لئے سست پچوں کو ترجیح دیتے ہیں۔
ریاستی اکائیوں نے پہلے ہی بی سی سی آئی کو اپنی خواہشات کی فہرست دے دی ہے، لیکن مقامات کو میچوں کی الاٹمنٹ کے بارے میں فیصلہ بی سی سی آئی ہی کرے گا۔
چنئی کے ایم اے چدمبرم اسٹیڈیم میں آسٹریلیا کے خلاف ہندوستان کے میچ کی میزبانی کا قوی امکان ہے جبکہ نیوزی لینڈ ، انگلینڈ اور جنوبی افریقہ کے خلاف میچ سست پچوں کے ساتھ دوسرے مراکز میں کھیلے جائیں گے۔
بی سی سی آئی نے ورلڈ کپ سے پہلے ملک بھر میں اسٹیڈیموں کو اپ گریڈ کرنے کے لئے 500 کروڑ روپے سے زیادہ مختص کیے ہیں۔
اسٹیڈیم کی حالت پر حالیہ تنقید کے بعد بی سی سی آئی کے لئے صاف بیت الخلا، آسان رسائی اور صاف نشستوں سمیت موجودہ بنیادی ڈھانچے کو اپ گریڈ کرنا اولین ترجیح ہے۔
