پاکستان اور نیوزی لینڈ کے درمیان ملتان میں شیڈول سیریز کا دوسرا ٹیسٹ میچ خراب موسم اور شدید دھند کے باعث ملتان سے منتقل کردیا گیا۔
ملتان سمیت پورا صوبہ پنجاب اس وقت شدید دھند کی لپیٹ میں ہے جس کی وجہ سے آمد و رفت کے مسائل کے ساتھ ساتھ میچز کے انعقاد میں بھی شدید مسائل پیش آ سکتے ہیں۔
جنوری میں شہر میں مزید دھند اور اسموگ کا امکان ہے جس کی وجہ سے اسٹیڈیم میں میچ کا انعقاد مشکل ہو گیا ہے۔
ابھی تک دوسرے میچ کے وینیو کے حوالے سے کوئی حتمی فیصلہ نہیں کیا گیا لیکن ممکنہ طور پر سیریز کے دوسرے ٹیسٹ کی میزبانی بھی کراچی کو ہی دی جا سکتی ہے جو 26 دسمبر سے سیریز کے پہلے ٹیسٹ میچ کی بھی میزبانی کرے گا۔
ملتان نے پاکستان اور انگلینڈ کے درمیان دوسرے ٹیسٹ میچ کی میزبانی کی تھی اور وہاں دھند یا خراب روشنی کی وجہ سے تو کھیل متاثر نہیں ہوا تھا البتہ فضا کا معیار راولپنڈی سے بھی زیادہ خراب تھا۔
انگلینڈ سے ٹیسٹ میچوں کے دوران دھند کی وجہ سے پرواز چار گھنٹے تاخیر کا شکار ہوئی تھی جبکہ حدنگاہ بھی معمول کے مقابلے میں کم ہوتی تھی البتہ صبح بجے میچ شروع ہونے تک دھوپ کی بدولت دھند کا کافی حد تک ختم ہو جاتا تھا۔
ایسے میں صرف کراچی اور راولپنڈی بھی میچز کی میزبانی کے لیے سب سے بہتر وینیوز بچتے ہیں کیونکہ ملک کے بقیہ حصوں میں بین الاقوامی کرکٹ کے انعقاد کے حوالے سے مناسب سہولیات میسر نہیں ہیں۔
پاکستان اور نیوزی لینڈ سیریز کے ملتان ٹیسٹ کی منتقلی پر دونوں بورڈز نے مشاورت مکمل کرلی۔ذرائع کے مطابق پاکستان اور نیوزی لینڈ کے ملتان ٹیسٹ کی منتقلی اور ایک ہی وینیو پر دو ٹیسٹ کرائے جانے پر کیوی کرکٹ بورڈ کی جانب سے کوئی اعتراض نہیں کیا گیا ہے۔
ذرائع کا کہنا ہےکہ نیوزی لینڈ کرکٹ بورڈ کی رضامندی کے بعد اب سیریز کا دوسرا ٹیسٹ بھی کراچی میں کھیلا جائے گا۔
ذرائع کے مطابق ملتان میں موسم کی صورتحال اور پروازوں میں تاخیر کے باعث ٹیسٹ میچ کی منتقلی کا فیصلہ کیا گیا ہے، یہ ٹیسٹ میچ کراچی میں ہونے کے حوالے سے ٹیم مینجمنٹ اور کھلاڑیوں کو بھی آگاہ کردیا گیا ہے، بورڈ اب جلد میچ کی منتقلی کا باضابطہ اعلان کرے گا۔
دونوں ٹیموں کے درمیان سیریز کا دوسرا ٹیسٹ میچ 3 جنوری سے کھیلا جائے گا۔دو ٹیسٹ میچوں کے بعد کراچی میں تین ون ڈے میچوں کی سیریز بھی کھیلی جائے گی۔
