چین کی وزارت تجارت نے یورپی یونین کی جانب سے چینی الیکٹرک گاڑیوں کی برآمدات کی تحقیقات کے فیصلے پر احتجاج کرتے ہوئے کہا ہے کہ یہ ایک "تحفظ پسند” عمل ہے جس کا مقصد سپلائی چین کو مسخ کرنا ہے۔
یورپی یونین نے بدھ کے روز اعلان کیا ہے کہ وہ چینی آٹومیکرز کو فراہم کی جانے والی حکومتی سبسڈی کی تحقیقات کرے گا جس کے بارے میں یورپی یونین کا مؤقف ہے کہ وہ ای وی کی قیمتوں کو مصنوعی طور پر کم رکھتا ہے۔
سبسڈی میں اربوں ڈالر کی سرمایہ کاری کے بعد چین بجلی سے چلنے والی گاڑیوں کی سب سے بڑی مارکیٹ بن گیا ہے۔
بی وائی ڈی اور گیلی جیسے آٹومیکرز نے جاپان اور یورپ میں ای وی کی فروخت شروع کرنے کے بعد تیزی سے مارکیٹ شیئر حاصل کیا ہے۔
چین کی وزارت تجارت کے ترجمان ہی یاڈونگ نے بیجنگ میں ایک بریفنگ کے دوران کہا، میں اس بات پر زور دینا چاہتا ہوں کہ یورپی یونین جو تحقیقاتی اقدام اٹھانے کا ارادہ رکھتی ہے وہ منصفانہ مسابقت کے نام پر اپنی صنعت کا تحفظ کرنا ہے۔
انہوں نے کہا، یہ ننگا تحفظ پسندانہ رویہ ہے جو یورپی یونین سمیت عالمی آٹوموٹو صنعتی زنجیر اور سپلائی چین کو سنگین طور پر متاثر اور مسخ کرے گا، اور چین- یورپی یونین کے اقتصادی اور تجارتی تعلقات پر منفی اثرات مرتب کرے گا۔
ایک بیان میں، وزارت نے یورپی یونین پر زور دیا کہ وہ "منصفانہ، غیر امتیازی اور متوقع” مارکیٹ ماحول پیدا کرے.
چین میں، ای وی کی قیمتیں ایک چارج پر 400 کلومیٹر (250 میل) رینج کے ساتھ کمپیکٹ ایس یو وی کے لئے 100،000 یوآن سے شروع ہوتی ہیں۔
جمعرات کے روز چائنا پیسنجر کار ایسوسی ایشن کے سربراہ کوئی ڈونگشو نے بھی اپنے وی چیٹ سوشل میڈیا اکاؤنٹ پر لکھے گئے تبصروں میں تحقیقات کی مخالفت کی۔
کوئی نے کہا میں ذاتی طور پر چین کی نئی توانائی گاڑیوں کی برآمدات کے یورپی یونین کے جائزے کی سختی سے مخالفت کرتا ہوں، اس لئے نہیں کہ اسے بھاری ریاستی سبسڈی ملی ہے، بلکہ اس لئے کہ چین کی صنعتی زنجیر انتہائی مسابقتی ہے.
انہوں نے کہا کہ چین نے 2022 میں توانائی کی نئی سبسڈی کو مرحلہ وار ختم کر دیا ہے۔
کوئی نے یورپی یونین پر زور دیا کہ وہ یورپ میں چینی الیکٹرک گاڑیوں کی قیمتوں کو بڑھانے کے لئے اقتصادی اور تجارتی اوزار استعمال کرنے کے بجائے چین کی الیکٹرک وہیکل انڈسٹری کی ترقی کا معروضی نقطہ نظر اختیار کرے۔
