بلوچستان کے ضلع بارکھان میں ایک دھماکے کی اطلاع ملی ہے جس کے نتیجے میں کم از کم چار افراد ہلاک اور متعدد زخمی ہوگئے ہیں۔
یہ دھماکہ صبح کے وقت رکھنی بازار میں اس وقت ہوا، جب مقامی لوگ خریداری میں مصروف تھے، جس میں کم از کم چار افراد ہلاک اور آٹھ دیگر زخمی ہو گئے۔
دھماکے کے فوری بعد پولیس اور مقامی حکام موقع پر پہنچ گئے اور علاقے کو گھیرے میں لے کر تحقیقات شروع کردی۔
لاشوں اور زخمیوں کو قریبی اسپتال منتقل کردیا گیا ہے، جبکہ پولیس کی مزید نفری طلب کرلی گئی ہے۔
دھماکے کی وجوہات ابھی تک واضح نہیں ہیں اور حکام نے مشتبہ افراد کے بارے میں کوئی تفصیلات جاری نہیں کی ہیں۔
صوبہ بلوچستان میں حالیہ مہینوں میں پرتشدد واقعات میں اضافہ ہوا ہے، جن میں بم دھماکے اور ٹارگٹڈ حملے شامل ہیں، جس کے نتیجے میں سیکیورٹی اقدامات اور عوامی تحفظ کے خدشات میں اضافہ ہوا ہے۔
