ایشین کرکٹ کونسل (اے سی سی) نے پاکستان کرکٹ بورڈ (پی سی بی) کی جانب سے ایشیا کپ 2023 کے مقام کے حوالے سے تجویز کردہ ہائبرڈ ماڈل کو قبول کرلیا ہے۔
حالیہ میڈیا رپورٹس میں بتایا گیا ہے کہ ایونٹ کے پہلے چار میچوں کی میزبانی پاکستان کرے گا، جبکہ بقیہ ٹورنامنٹ کولمبو اور پالی کیلے میں ہوں گے۔
50 اوورز پر مشتمل ایشیا کپ ستمبر میں ہونا ہے اور اس میں شریک تمام ممالک نے اس تجویز کو گرین سگنل دے دیا ہے۔
پی سی بی نے ہائبرڈ ماڈل کی تجویز پیش کی تھی، جس میں بھارت کو اپنے میچز نیوٹرل مقام پر کھیلنے کی پیشکش کی گئی تھی، جبکہ بھارت نے پورے ٹورنامنٹ کو نیوٹرل مقام پر منتقل کرنے پر اصرار کیا تھا۔
اب تمام بورڈز نے ایشیا کپ 2023 کے لیے پی سی بی کے ہائبرڈ ماڈل کو قبول کرتے ہوئے سری لنکا کو شریک میزبان نامزد کیا ہے۔
اس پلان کے مطابق بھارت کے علاوہ تمام شرکا پاکستان میں ایک ایک میچ کھیلیں گے، دوسرے مرحلے میں بھارت سمیت تمام ٹیمیں اپنے بقیہ میچز سری لنکا میں کھیلیں گی۔
واضح رہے کہ پاکستان نے بی سی سی آئی کو خبردار کیا تھا کہ وہ آئندہ ون ڈے ورلڈ کپ 2023 میں شرکت سے انکار کر دے گا۔
