کراچی: وزیر بلدیات سندھ سید ناصر حسین شاہ نے معروف شاعر، ادیب امجد اسلام امجد کے انتقال پر تعزیت کا اظہار کرتے ہوئے کہا ہے کہ مرحوم امجد اسلام امجد کی جانب سے اردو ادب کو فروغ دینے سمیت مختلف شعبوں میں کی گئی گرانقدر خدمات کو ہمیشہ یاد رکھا جائے گا۔
اپنے ایک بیان میں انہوں نے کہاکہ معروف شاعر، ادیب اور ڈرامہ نویس امجد اسلام امجد کے انتقال کی خبر سن کر بہت افسوس ہوا۔
وزیر بلدیات سندھ سید ناصر حسین شاہ نے کہاکہ مرحوم امجد اسلام امجد نے اپنے منفرد انداز میں شاعری اور ڈرامہ نگاری سے عوام کے دلوں میں اپنا اچھا مقام بنایا۔
سید ناصر حسین شاہ نے مزید کہاکہ مرحوم کے لواحقین سے دلی ہمدردی اور تعزیت کا اظہار کرتے ہیں۔
انہوں نے دعا کی کہ اللہ تعالیٰ مرحوم کی روح کو جوار رحمت میں جگہ دے اور غمزدہ خاندان کو صبر جمیل دے۔
