کراچی (ویب ڈیسک): کراچی سمیت سندھ کے مختلف علاقوں میں وقفے وقفے سے بارش کا سلسلہ جاری ہے، کئی علاقوں میں برساتی نالوں میں طغیانی مختلف کینالوں میں شگاف پڑنے سے درجنوں دیہات زیر آب آگئے۔کراچی کے علاقے گلشن حدید، ملیر، شاہ فیصل، ائیرپورٹ، گلستان جوہر اور اطراف کے علاقوں میں بارش کا سلسلہ جاری ہے، فیڈرل بی ایریا، گلشن اقبال، ڈرگ روڈ، راشد منہاس روڈ، پی آئی بی، ناظم آباد سمیت شہر کے بیشتر حصوں میں وقفے وقفے سے بارش جاری ہے، بارش کے بعد شہر کی مختلف شاہراہوں پر ٹریفک کی روانی متاثر ہے جبکہ کئی علاقوں میں بجلی کی فراہمی بھی معطل ہوگئی ہے۔ادھر روہڑی کینال میں ڈیڑھ سو فٹ چوڑا شگاف پڑنے سے زرعی زمینیں زیر آب آگئی ہیں۔ ڈپٹی کمشنر سانگھڑ کا کہنا ہے کہ سکھر بیراج سے روہڑی کینال کا پانی بند کروا دیا ہے، پانی کی سطح کم ہونے پر شگاف پُر کرنے کا کام شروع کیا جائے گا۔
دوسری جانب جیکب آباد کےعلاقے میرانپور کے قریب بیگاری کینال میں 100 فٹ چوڑا شگاف پڑ گیا، شگاف سے سینکڑوں ایکڑ پر کھڑی چاول کی فصل متاثر ہوگئی اور درجنوں دیہات زیرآب آ گئے۔
سکھر کی تحصیل صالح پٹ میں بمبلی مائینر میں شگاف پڑنے سے نہری پانی چار دیہاتوں میں داخل ہوگیا، سیکڑوں ایکڑ اراضی اور کپاس کی فصل زیر آب آگئی۔
کھیر تھر پھاڑی سلسلوں میں وقفے وقفے سے جاری بارش سے گاج، سول ندی اور نلی ہلیلی میں طغیانی آگئی، سیلابی ریلوں سے تحصیل جوہی کی 5 یونین کونسل متاثر جبکہ فریدہ آباد کے 65 سے زائد دیہات کا جوہی سے رابطہ منقطع ہوگیا، سیلابی صورتحال سے جوہی کے حفاظتی بند کے نو تعمیر شدہ پلوں میں بھی دراڑیں پڑ گئی ہیں۔
خیرپور میں مسلسل موسلا دھار بارش کے باعث سڑکیں، شہری اور دیہی علاقے زیر آب آگئے، کھجور، کپاس سمیت دیگر فصلیں شدید متاثر ہوگئی ہیں۔
بلوچستان کے مختلف اضلاع میں بھی موسلادھار بارشوں کے باعث ندی نالوں میں طغیانی ہے، صحبت پور میں شاہی واہ کینال میں شگاف پڑنے سے متعدد دیہاتوں میں پانی داخل ہوگیا، پنجرہ پل کے مقام پر بولان ندی میں بھی سیلابی صورتحال ہے۔
