(ویب ڈیسک):معروف پاکستانی اداکار بہروز سبزواری نے ڈھکے چھپے الفاظ میں اپنی سابقہ بہو اداکارہ سائرہ یوسف کو دوسری شادی کا مشورہ دیا ہے۔حال ہی میں ایک پوڈ کاسٹ میں گفتگو کرتے ہوئے بہروز سبزواری نے کہا کہ ہم نے کبھی بھی سائرہ کو اپنے آپ سے الگ نہیں سمجھا، سائرہ کے والد بیمار ہیں اور بستر پر ہیں اور سائرہ اپنی پوری فیملی کو دیکھتی ہے یہ اس میں خاصیت ہے۔
سینئر اداکار نے کہا کہ شہروز اور سائرہ کے دماغ آپس میں نہیں ملے اس میں میرا کوئی قصور نہیں ہے، نہ ہی میں کچھ کرسکتا ہوں اور سائرہ ، شہروز کی بیٹی نوریح ہماری اولاد ہے، ہمارا خون ہے۔
انہوں نے مزید کہا کہ ہم سائرہ کو نہیں چھوڑ سکتے، باخدا میں تو اب بھی اسے کہتا ہوں کہ بیٹا سیٹل ڈاؤن ہوجاؤ جیسے شہروز ہوگیا، اپنی زندگی گزارو اور میں باپ بن کے تمہارے ساتھ کھڑا ہوں۔
بہروز سبزواری نے بتایا کہ صدف اور شہروز کی بیٹی زہرہ روز تین چار گھنٹے سائرہ کے پاس رہتی ہے اور اس کا کریڈٹ مجھ سمیت میری اہلیہ سفینہ، صدف، شہروز اور سائرہ کو جاتا ہے۔
واضح رہے کہ سائرہ اور شہروز نے 2020 میں طلاق کا اعلان کیا تھا، دونوں کی شادی 2012 میں ہوئی تھی، دونوں کی ایک بیٹی نوریح ہے۔
بعدازاں 2020 میں شہروز سبزواری نے اداکارہ و ماڈل صدف کنول سے شادی کرلی تھی جن کے ہاں بیٹی زہرہ کی پیدائش ہوئی۔
