اسلام آباد: بجلی کے بلوں میں اضافے اور بھاری ٹیکسوں کے خلاف مختلف شہروں میں احتجاجی مظاہرے کئے گئے۔
پاکستان کے مختلف شہروں میں لوگ مہنگی بجلی کے خلاف مظاہروں میں حصہ لے رہے ہیں اور حکومت سے اس کی قیمت کم کرنے کا مطالبہ کر رہے ہیں، مظاہرین نے ہاتھوں میں پلے کارڈز اٹھا رکھے تھے جن پر حکومت کے خلاف نعرے درج تھے۔
ملتان، فیصل آباد، نوشہرہ، بہاولپور، صادق آباد، حجرہ شاہ مقام، اوکاڑہ، قصور، مالاکنڈ اور دیگر علاقوں میں احتجاجی مظاہرے کیے گئے۔
نعرے بازی کے دوران مظاہرین نے حکومت سے مطالبہ کیا کہ وہ بڑھے ہوئے بلوں کو واپس لے اور بجلی کے چارجز اور ٹیکسوں کو بھی کم کرے۔
فیصل آباد میں شیخوپورہ روڈ پر لوگوں نے ٹریفک کو معطل کردیا اور فیصل آباد الیکٹرک سپلائی کمپنی (فیسکو) کے خلاف نعرے بازی کی۔
رسالپور، نوشہرہ میں تاجروں نے بجلی کے بھاری بلوں کے خلاف جی ٹی روڈ پر اپنے شٹر بند کردیے اور ٹریفک بلاک کردی۔
انہوں نے کہا کہ اگر حکومت نے یوٹیلیٹی ریٹس میں کمی نہ کی تو احتجاج کا وقت پورے ملک میں پھیل جائے گا۔
بہاولپور میں مظاہرین نے سندھ اور پنجاب کو ملانے والی مرکزی شاہراہ کے ایل پی روڈ پر ٹریفک بند کردی، بندش کی وجہ سے لوگوں کو اپنی منزل تک پہنچنے میں مشکلات کا سامنا کرنا پڑا۔
بلال چوک ملتان کو بھی بجلی کے بلوں میں اضافے کے خلاف احتجاج کے باعث ٹریفک کے مسائل کا سامنا کرنا پڑا۔
صادق آباد میں بجلی کے زائد بلوں کے خلاف تاجر تنظیموں نے احتجاجی ریلی نکالی، مظاہرین نے پلے کارڈز اٹھا رکھے تھے اور ملتان الیکٹرک سپلائی کمپنی (میپکو) کے خلاف نعرے بازی کر رہے تھے۔
