پاکستان کرکٹ ٹیم کے سابق فاسٹ بولر عاقب جاوید نے وائٹ بال کرکٹ کے میدان میں زمان خان کو نسیم شاہ سے اوپر قرار دے دیا ہے۔
ایک پریس کانفرنس میں عاقب نے کرکٹ کے مختصر فارمیٹ میں زمان کی غیر معمولی صلاحیتوں پر روشنی ڈالی اور خاص طور پر اہم ڈیتھ اوورز کے دوران باؤلر کی حیثیت سے ان کی مہارت کو سراہا۔
انہوں نے کہا کہ وائٹ بال کرکٹ میں زمان خان کے پاس جو صلاحیتیں ہیں، ہم حال ہی میں کینیڈا گئے ہیں، میرے خیال میں وہ اس وقت دنیا کے بہترین ڈیتھ بال بولرز میں سے ایک ہیں، میں انہیں وائٹ بال کرکٹ میں نسیم سے زیادہ درجہ دیتا ہوں۔
ایک ہلکے پھلکے لمحے میں، سابق فاسٹ بولر نے مزاحیہ انداز میں لاہور قلندرز کے بارے میں ممکنہ تعصب کا اعتراف کیا، جس سے وہ وابستہ رہے ہیں۔
انہوں نے کہا کہ آپ کہیں گے کہ میں صرف لاہور قلندرز کے بولرز کی حمایت کر رہا ہوں، شاہین شاہ آفریدی، حارث اور زمان کو وائٹ بال کرکٹ میں آپ کا بولر ہونا چاہیے اور پھر آپ نسیم شاہ کے پاس جا سکتے ہیں۔
قومی سلیکشن کمیٹی کے سربراہ انضمام الحق نے اے سی سی مینز ایشیا کپ اور افغانستان کے خلاف تین ایک روزہ میچوں کی سیریز کے لیے اسکواڈز کا اعلان کردیا۔
انضمام الحق نے شاہین شاہ آفریدی، نسیم شاہ، حارث رؤف، محمد وسیم اور فہیم اشرف کو فاسٹ بولر کے طور پر منتخب کیا اور زمان کو باہر کرنے کی وجہ بتائی۔
انہوں نے کہا کہ زمان خان نے وائٹ بال سے اچھی کارکردگی کا مظاہرہ کیا ہے لیکن 50 اوورز کے میچوں میں ان کے پاس تجربہ نہیں ہے لیکن ان میں وہ صلاحیت موجود ہے جو ہم نے ٹی 20 میچوں میں دیکھی ہے جہاں انہوں نے اچھی کارکردگی کا مظاہرہ کیا ہے، لہٰذا اگر وہ زیادہ فرسٹ کلاس میچز کھیلتے ہیں تو وہ پاکستان کے لیے اچھا اثاثہ بن جائیں گے۔
