پاکستان کرکٹ بورڈ نئی سلیکشن کمیٹی کا اعلان دو سے تین روز میں کرے گا۔ افغانستان کے خلاف سیریز اور ایشیا کپ کے لیے واحد قومی ٹیم کا اعلان 12 اگست تک متوقع ہے۔
کرکٹ کمیٹی کے سربراہ مصباح الحق مختلف کھلاڑیوں سے رابطے میں ہیں جنہیں سلیکشن کی ذمہ داریاں سونپی جائیں گی۔
نئی سلیکشن کمیٹی کا پہلا کام پاکستان اور افغانستان کے درمیان سری لنکا میں ہونے والی سیریز کے لیے ٹیم کا انتخاب کرنا ہے اور یہی ٹیم ایشیا کپ میں شرکت کرے گی۔ ورلڈ کپ کے لیے سلیکشن الگ الگ ہوگی جس کی ڈیڈ لائن 25 اگست ہوگی۔
پاکستان اور افغانستان کے درمیان سیریز کا پہلا میچ 22 اگست، دوسرا 24 اگست کو ہمبنٹوٹا اور تیسرا 26 اگست کو کولمبو میں کھیلا جائے گا۔
