چین کے دارالحکومت بیجنگ میں 40 گھنٹے کی مسلسل بارش نے 140 سال پرانا ریکارڈ توڑ دیا، جو 1891 میں ریکارڈ کی گئی اب تک کی سب سے شدید بارش تھی۔
بیجنگ کے محکمہ موسمیات نے بدھ کے روز جاری ہونے والے ایک بیان میں کہا ہے کہ طوفان کی وجہ سے ہونے والی حالیہ بارشوں نے چین کے دارالحکومت میں 140 سال قبل ہونے والی بارشوں کا ریکارڈ توڑ دیا ہے۔
بیجنگ محکمہ موسمیات کے مطابق اس طوفان کے دوران زیادہ سے زیادہ بارش 744.8 ملی میٹر ریکارڈ کی گئی جو چانگ پنگ میں وانگ جیوان آبی ذخائر میں ہوئی۔
چین کا کہنا ہے کہ طوفان کے نتیجے میں شمالی علاقے میں سیلاب سے 20 افراد ہلاک ہوئے ہیں، فوجی ہیلی کاپٹر سیلاب متاثرین تک امداد پہنچا رہے ہیں۔
سروس نے مزید کہا کہ 140 سال پہلے ریکارڈ کی گئی بارش کا سب سے زیادہ حجم 609 ملی میٹر تھا۔ جو اس بار سے 135.8 ملی میٹر کم ہے۔
طوفان ڈوکسوری ایک سابق سپر طوفان ہے جو ابتدائی طور پر فلپائن سے ٹکرایا تھا، جس کے بعد یہ گزشتہ ہفتے جنوبی صوبے فوجیان کی طرف بڑھا اور اب چین کے اوپر شمال کی طرف بڑھ رہا ہے۔
محکمہ موسمیات کے مطابق صرف 40 گھنٹوں میں ریکارڈ کی گئی بارش جولائی کے پورے مہینے کی اوسط بارش کے قریب ہے۔
سرکاری میڈیا نے گزشتہ ہفتے خبردار کیا تھا کہ شمالی چین میں شدید بارشوں سے 13 0 ملین افراد متاثر ہوں گے۔
بیجنگ کے مضافاتی علاقے اور آس پاس کے علاقے بھی بارش سے بری طرح متاثر ہوئے ہیں۔
سرکاری میڈیا کے مطابق دارالحکومت اور ہمسایہ صوبے ہیبی سے 9 لاکھ 74 ہزار 400 افراد کو محفوظ مقامات پر منتقل کیا گیا ہے۔
چین کی سرکاری خبر رساں ایجنسی ژنہوا کے مطابق بارش کم ہونے کے بعد توجہ امدادی سرگرمیوں کی جانب مبذول ہو گئی اور چینی ریڈ کراس کے سیکڑوں امدادی کارکنوں کو ملبہ ہٹانے اور متاثرین کو نکالنے میں مدد کے لیے متاثرہ علاقوں میں بھیج دیا گیا۔
چین کے سرکاری نشریاتی ادارے سی سی ٹی وی نے منگل کے روز خبر دی ہے کہ بیجنگ میں شدید بارشوں کے نتیجے میں کم از کم 11 افراد ہلاک ہو گئے ہیں جن میں دو امدادی اور امدادی کارکن بھی شامل ہیں۔
نشریاتی ادارے کا کہنا ہے کہ 13 افراد اب بھی لاپتہ ہیں تاہم مزید 14 افراد محفوظ پائے گئے ہیں۔ بیجنگ کے ہمسایہ صوبے ہیبی میں نو افراد ہلاک اور چھ لاپتہ ہیں۔
ہفتے کے آخر میں شمال مشرقی صوبہ لیاوننگ میں مزید دو ہلاکتوں کی اطلاع ملی ہے۔
چین کے صدر شی جن پنگ نے منگل کے روز بارش وں کی وجہ سے کھوئے ہوئے یا پھنسے ہوئے لوگوں کو بچانے کے لیے ہر ممکن کوشش کرنے پر زور دیا ہے۔
نائب وزیر اعظم ژانگ گوکنگ نے دارالحکومت کے سب سے زیادہ متاثرہ علاقوں میں سے ایک بیجنگ کے منتاگو میں امدادی کاموں کے مقام کا دورہ کرتے ہوئے زور دیا کہ لاپتہ افراد کو بچانے کے لئے ہر ممکن کوشش کی جانی چاہئے۔
