بیجنگ: آئی سی سی انڈر 19 ویمنز ٹی ٹونٹی ورلڈ کپ اور ایمرجنگ ویمنز ٹیمز ایشیا کپ میں شاندار کارکردگی کا مظاہرہ کرنے والی بائیں ہاتھ کی اسپنر انوشہ ناصر اور دائیں ہاتھ کی بلے باز شوال ذوالفقار کو چین کے شہر ہانگژو میں ہونے والے ایشین گیمز کے لیے پاکستان کی سینئر ویمنز اسکواڈ میں شامل کیا گیا ہے۔
15 رکنی اسکواڈ میں ڈیانا بیگ بھی شامل ہیں جو رواں سال جنوری میں آسٹریلیا کے خلاف تیسرے اور آخری ایک روزہ بین الاقوامی میچ میں انگلی کی چوٹ سے صحت یاب ہونے کے بعد بین الاقوامی کرکٹ میں واپسی کر رہی ہیں۔
گزشتہ دو ایڈیشنز میں سونے کے تمغے جیتنے والی پاکستانی خواتین ٹیم 2010 میں گوانگچو، چین اور 2014 میں جنوبی کوریا کے شہر انچیون میں منعقد ہوئی تھی اور اس سال 19 سے 26 ستمبر تک ہونے والے ایونٹ میں ان کی نظریں ہیٹ ٹرک کرنے پر مرکوز ہوں گی، ایونٹ ٹی 20 فارمیٹ میں کھیلا جائے گا۔
آئی سی سی ٹی ٹونٹی رینکنگ اور ٹورنامنٹ کے قواعد کے مطابق پاکستان ویمنز ٹیم 22 سے 24 ستمبر تک ہونے والے کوارٹر فائنل سے ایونٹ میں حصہ لے گی۔
سیمی فائنلز 25 ستمبر کو کھیلے جائیں گے جبکہ فائنل 26 ستمبر کو کھیلا جائے گا۔ کانسی کے تمغے کا مقابلہ بھی منگل 26 ستمبر کو ہوگا۔
سلیم جعفر، ہیڈ کوچ مارک کولز اور کپتان ندا ڈار کی سربراہی میں خواتین کی سلیکشن کمیٹی کے درمیان مشاورت کے بعد 15 رکنی اسکواڈ کو حتمی شکل دی گئی۔
ٹیم میں ندا ڈار (کپتان)، عالیہ ریاض، انوشہ ناصر، ڈیانا بیگ، فاطمہ ثنا، منیبہ علی، ناجیحہ علوی، ناشرہ سندھو، نتالیا پرویز، عمائمہ سہیل، صدف شمس، شوال ذوالفقار، سدرہ امین، سیدہ عروب شاہ اور ام ہانی شامل ہیں۔
ایشین گیمز سے قبل پاکستان ویمنز ٹیم یکم سے 14 ستمبر تک کراچی میں جنوبی افریقہ کے خلاف تین ٹی ٹوئنٹی اور تین ون ڈے میچوں پر مشتمل ہوم سیریز کھیلے گی، دو طرفہ سیریز کے لئے اسکواڈ کا اعلان مناسب وقت پر کیا جائے گا۔
