صدر مملکت ڈاکٹر عارف علوی نے مخیر اور تعلیمی کارکن شہزاد رائے کو تعلیمی اصلاحات اور بچوں کی معاونت میں ان کی خدمات پر ایجوکیشن ایکسیلینس ایوارڈ سے نوازا۔
یہ ایوارڈ راولپنڈی چیمبر آف کامرس اینڈ انڈسٹری کے زیر اہتمام ایوان صدر میں منعقدہ سمٹ میں دیا گیا۔
صدر مملکت نے اخوت فاؤنڈیشن کے سربراہ ڈاکٹر محمد امجد ثاقب سمیت چند دیگر ماہرین تعلیم کو یہ ایوارڈ دیا۔
شہزاد رائے ایک گلوکار، بانی اور زندگی ٹرسٹ کے صدر ہیں، اور ملک کے لئے ان کی مثالی خدمات کے لئے تمغہ امتیاز اور ستارہ امتیاز سے نوازا جا چکا ہے۔
ان کی انتھک کوششوں کے نتیجے میں قومی اسمبلی نے جسمانی سزا کو جرم قرار دینے والا قانون منظور کیا، اس سے قبل نیک نیتی سے بچوں کو مارنا قابل قبول تھا۔
آہنگ اینڈ زندگی ٹرسٹ کے مسلسل کام کی وجہ سے آہنگ کے نصاب زندگی کی مہارتوں پر مبنی تعلیم (ایل ایس بی ای) کو سندھ کے اسکولی نصاب میں ضم کر دیا گیا، امید ہے کہ لاکھوں بچوں کو استحصال سے بچانے میں مدد ملے گی۔
سندھ حکومت کی جانب سے سرکاری اساتذہ کے لیے زندگی ٹرسٹ کی جانب سے تیار کردہ اساتذہ کی کارکردگی کا جائزہ لینے کے نئے فارمیٹ کی منظوری دے دی گئی ہے اور اب اساتذہ کا جائزہ تمام سرکاری ملازمین پر لاگو سالانہ خفیہ رپورٹ (اے سی آر) کے عمومی میٹرکس کے بجائے تدریسی پیشے سے متعلق عوامل جیسے طالب علموں پر مرکوز تدریس اور فعال کلاس روم مینجمنٹ کی بنیاد پر لیا جائے گا۔
وزارت نیشنل ہیلتھ سروسز، ریگولیشنز اینڈ کوآرڈینیشن کے لئے خاندانی منصوبہ بندی اور آبادی کے سفیر کی حیثیت سے شہزاد رائے قومی کمیٹی برائے زچگی اور نوزائیدہ صحت کے ذریعہ تیار کردہ ایک آن لائن تولیدی صحت کورس کو حتمی شکل دینے کے عمل میں ہیں۔
یہ کورس نیشنل ڈیٹا بیس اینڈ رجسٹریشن اتھارٹی (نادرا) کے ساتھ منسلک کیا جائے گا، جس کا مطلب ہے کہ شادی کرنے والے کسی بھی جوڑے کو نادرا کے ساتھ اپنا نکاح نامہ رجسٹرڈ کروانے کے لیے یہ کورس مکمل کرنا ہوگا۔
اس سے جوڑوں کے درمیان وقفہ، مانع حمل ادویات، ماں اور بچے کی صحت کے بارے میں معلومات میں بے پناہ اضافہ ہوگا۔
