صدر مملکت ڈاکٹر عارف علوی اور وزیراعظم شہباز شریف نے مزدوروں کے عالمی دن کے موقع پر اپنے الگ الگ پیغامات میں محنت کشوں کو ان کی محنت پر زبردست خراج تحسین پیش کیا اور ان کے حقوق کے تحفظ پر زور دیا۔
صدر مملکت نے ایک بیان میں کہا کہ اس سال ہم مزدوروں کے وقار کے تئیں اپنے عزم کا اعادہ کرنے اور ان کے بنیادی حقوق کے لئے مزدوروں کی جرات مندانہ جدوجہد کو خراج تحسین پیش کرنے کے عزم کے ساتھ یوم مزدور منا رہے ہیں۔
انہوں نے کہا کہ لیبر فورس ہماری معیشت میں ریڑھ کی ہڈی کی حیثیت رکھتی ہے اور غیر منصفانہ لیبر پریکٹسز کی حوصلہ شکنی کے لئے لیبر قوانین کو سختی سے نافذ کرکے ان کے حقوق کے تحفظ کے لئے اقدامات کرنا انتہائی ضروری ہے۔
وزیر اعظم نے اپنے پیغام میں مزدوروں کے کام کرنے اور رہنے کے معیار کو بہتر بنانے اور انہیں بہتر رہائش، تعلیم اور صحت کی سہولیات فراہم کرکے ان کی فلاح و بہبود کو فروغ دینے کے عزم کا اظہار کیا۔
انہوں نے کہا کہ مہنگائی کی بلند شرح اور دیگر معاشی چیلنجز کو مدنظر رکھتے ہوئے حکومت نے مزدوروں کی کم از کم ماہانہ اجرت 17 ہزار 500 روپے سے بڑھا کر 25 ہزار روپے کردی ہے۔
وزیر اعظم نے کہا کہ حکومت نے پیشہ ورانہ تربیت اور ہنر مندی کی ترقی کے پروگرام بھی شروع کیے ہیں، تاکہ کارکنوں کو ملک کے اندر اور باہر روزگار کی منڈیوں میں ان کا مناسب حصہ مل سکے۔
