پاکستان مسلم لیگ (ن) کے قائد نواز شریف اور سینئر نائب صدر مریم نواز نے جمعہ کو سعودی ولی عہد شہزادہ محمد بن سلمان سے ملاقات کی۔
ملاقات کے دوران فریقین نے پاکستان کو درپیش موجودہ مسائل اور ان کے حل پر تفصیلی تبادلہ خیال کیا۔
ذرائع کے مطابق سابق وزیراعظم اور ولی عہد کے درمیان ملاقات مثبت رہی۔
تین مرتبہ وزیر اعظم رہنے والے اور مسلم لیگ (ن) کے چیف آرگنائزر اس وقت سعودی عرب میں ہیں کیونکہ انہوں نے اپنے خاندان کے دیگر افراد کے ساتھ عمرہ ادا کیا تھا۔
شریف خاندان 11 اپریل کو سعودی عرب پہنچا تھا، نواز شریف چھ سال بعد سعودی عرب کا دورہ کر رہے ہیں۔
ذرائع نے مزید بتایا کہ نواز شریف نے ابتدائی طور پر 26 اپریل تک مملکت میں قیام کا منصوبہ بنایا تھا، لیکن حسین نواز اور ان کے اہل خانہ نے ان سے درخواست کی تھی کہ وہ جدہ میں اپنے قیام کو اپنی رہائش گاہ پر طول دیں۔
ذرائع کے مطابق نواز شریف جدہ میں خادم الحرمین الشریفین شاہ سلمان بن عبدالعزیز سے بھی ملاقات کریں گے۔
رواں ماہ کے اوائل میں ذرائع نے دعویٰ کیا تھا کہ سعودی فرمانروا شاہ سلمان بن عبدالعزیز آل سعود نے خیر سگالی کے اظہار کے طور پر نواز شریف اور وزیراعظم شہباز شریف کو عمرہ کی ادائیگی کے لیے سعودی عرب آنے کی دعوت دی تھی۔
