اسلام آباد کی ڈسٹرکٹ اینڈ سیشن عدالت نے پی ٹی آئی کے سربراہ عمران خان کے فوکل پرسن اور بھتیجے بیرسٹر حسان نیازی کو اسلحہ کی نمائش اور ریاستی معاملات میں مداخلت سے متعلق کیس میں 2 روزہ جسمانی ریمانڈ پر پولیس کے حوالے کردیا۔
جوڈیشل مجسٹریٹ عباس شاہ نے محفوظ فیصلہ سناتے ہوئے نیازی کو دو روزہ جسمانی ریمانڈ پر پولیس کے حوالے کردیا، جبکہ تفتیشی افسر نے پی ٹی آئی رہنما کے 7 روزہ جسمانی ریمانڈ کی استدعا کی تھی، تاہم درخواست مسترد کردی گئی۔
اس سے قبل 20 مارچ کو پولیس نے حسان کو انسداد دہشت گردی کی عدالت کے باہر سے گرفتار کیا تھا اور نیازی پر جوڈیشل کمپلیکس میں پولیس وین اور اہلکاروں پر حملے کی منصوبہ بندی کرنے کا الزام عائد کیا تھا جب پی ٹی آئی کارکنوں اور پولیس کے درمیان جھڑپیں ہوئیں۔
ایف آئی آر کے مطابق پرتشدد تصادم کے دوران کھڑکیوں کے شیشے توڑ دیے گئے اور کمپلیکس کا مین گیٹ توڑ دیا گیا جبکہ قانون نافذ کرنے والے اداروں اور پی ٹی آئی کے حامیوں کی ایک ٹیم نے ایک دوسرے کے خلاف انسداد فسادات کے آلات کا استعمال کیا۔ پی ٹی آئی کے حامیوں نے کئی گاڑیوں کو نذر آتش کردیا۔
دریں اثناء پی ٹی آئی نے ٹوئٹر پر دعویٰ کیا ہے کہ نیازی کے خلاف درج تمام مقدمات میں ضمانت ملنے کے باوجود انہیں سپرنٹنڈنٹ آف پولیس نوشیروان علی چانڈیو نے اغوا کیا ہے۔
پی ٹی آئی نے کہا کہ یہ پولیس کی بربریت کی انتہا ہے حسان نیازی ایک وکیل ہیں جن کی ضمانت عدالت نے حال ہی میں منظور کی تھی، انہیں اغوا کر لیا گیا ہے۔
