پنجاب اور خیبرپختونخوا میں انتخابات نہ کرانے کے ازخود نوٹس پر سپریم کورٹ کی 9 رکنی لارجر بینچ آج سماعت کرے گی۔
گذشتہ دن چیف جسٹس آف پاکستان نے دو رکنی بینچ کی سفارش پر معاملے کا نوٹس لیا تھا، سپریم کورٹ نے سماعت کے لئے نو رکنی بینچ تشکیل دیا ہے۔
چیف جسٹس عمر عطا بندیال کی سربراہی میں سپریم کورٹ کے 9 رکنی بینچ میں جسٹس اعجاز الاحسن، جسٹس منصور علی شاہ، جسٹس منیب اختر، جسٹس یحییٰ آفریدی، جسٹس مظاہر علی اکبر نقوی، جسٹس جمال مندوخیل، جسٹس محمد علی مظہر اور جسٹس اطہر من اللہ شامل ہیں۔
سپریم کورٹ آج کی سماعت میں تین سوالوں پر غور کرے گا، سوال یہ ہے کہ یہ کس کی ذمہ داری ہے کہ جب صوبائی اسمبلی کو تحلیل کیا جائے تو انتخابات کی تاریخ کا اعلان کیا جائے۔
عدالت کے سامنے دوسرا سوال یہ ہوگا کہ انتخابات کی تاریخ کا اعلان کرنے کے لیے آئینی اختیار کب اور کیسے استعمال کیا جائے گا اور تیسرا یہ کہ وفاق اور صوبوں میں عام انتخابات کے حوالے سے کیا ذمہ داری ہے۔
