وزارت خزانہ نے انکشاف کیا ہے کہ رواں مالی سال کے پہلے تین ماہ کے دوران گزشتہ سال کے اسی عرصے کے مقابلے میں حکومت کے نان ٹیکس محصولات میں 243 ارب روپے کا اضافہ ہوا ہے۔
وزارت خزانہ کے مطابق رواں مالی سال جولائی سے ستمبر تک حکومت نے 453 ارب روپے سے زائد کی نان ٹیکس آمدن حاصل کی۔ گزشتہ مالی سال کے اسی عرصے کے دوران نان ٹیکس ریونیو کا حجم 210.60 ارب روپے تھا۔
وزارت نے انکشاف کیا کہ رواں مالی سال کے پہلے تین ماہ میں پیٹرولیم لیوی کی مد میں 222 ارب روپے سے زائد وصول کیے گئے ہیں جبکہ گزشتہ سال اسی عرصے کے دوران اسی مد میں صارفین سے 47 ارب 47 کروڑ روپے وصول کیے گئے تھے۔
آئی ایم ایف معاہدے کے تحت ڈیزل پر 55 روپے فی لیٹر اور پٹرول پر 60 روپے فی لیٹر لیوی کی وصولی جاری ہے۔
رواں مالی سال میں پیٹرولیم لیوی کی وصولی کا مجموعی ہدف 869 ارب روپے ہے۔
وزارت کی رپورٹ کے مطابق سرکاری اداروں کو مارک اپ کی مد میں 66 ارب 76 کروڑ روپے، پاسپورٹ فیس کی مد میں 14 ارب 54 کروڑ روپے اور تیل و گیس سے رائلٹی کی مد میں 41 ارب 65 کروڑ روپے موصول ہوئے۔
رپورٹ میں مزید کہا گیا ہے کہ پی ٹی اے سمیت ریگولیٹری اتھارٹیز نے 3 ارب 58 کروڑ روپے کا منافع کمایا، اسلام آباد کی ضلعی انتظامیہ نے 5 ارب 22 کروڑ 20 لاکھ روپے ریونیو کمایا اور صوبوں نے مارک اپ کی مد میں 18 ارب روپے سے زائد جمع کیے۔
