پاکستان تحریک انصاف (پی ٹی آئی) کے چیئرمین اور سابق وزیراعظم عمران خان نے سابق آرمی چیف جنرل (ر) قمر جاوید باجوہ پر الزام عائد کیا ہے کہ وہ پاکستان کو بحرانوں میں دھکیل رہے ہیں۔
ان خیالات کا اظہار انہوں نے لاہور کے زمان پارک میں اپنی رہائش گاہ سے ویڈیو لنک کے ذریعے پاکستان تحریک انصاف (پی ٹی آئی) کی خواتین کنونشن سے خطاب کرتے ہوئے کیا۔
عمران خان نے کہا کہ جنرل باجوہ پاکستان کو اس بدحالی میں دھکیلنے کے ذمہ دار ہیں جس میں وہ آج ہے، انہوں نے اس بات کا اعادہ کیا کہ انہوں نے شوکت ترین کو یہ پیغام دیا تھا کہ اگر اس وقت سیاسی عدم استحکام پیدا کیا گیا تو ملک کی معیشت کو سنبھالا نہیں جائے گا۔
انہوں نے کہا کہ ہم سب جانتے ہیں کہ وہ کون تھا جس کے فیصلے نے پاکستان کو بحران میں دھکیل دیا، انہوں نے مزید کہا کہ انہوں نے سات ماہ قبل اس ‘عدم استحکام’ کی پیش گوئی کی تھی۔
تحریک انصاف کے سربراہ نے شریف اور زرداری خاندان کو ملک کی معیشت کو تباہ کرنے پر شدید تنقید کا نشانہ بناتے ہوئے کہا کہ 90 کی دہائی میں جب ان دونوں خاندانوں نے شراکت داری کی تو پاکستان نے ترقی کرنا چھوڑ دیا۔
عمران خان کا مزید کہنا تھا کہ ملک کا مستقبل ان کی پارٹی کی جدوجہد سے جڑا ہوا ہے۔ انہوں نے کہا کہ 30 سال تک اقتدار میں رہنے والی دو بڑی سیاسی جماعتیں اب اتحادی ہیں، عوام اب پی ٹی آئی کی طرف دیکھ رہے ہیں۔
انہوں نے کہا کہ پاکستان ڈیموکریٹک موومنٹ (پی ڈی ایم) کی حکومت کی تمام تر ترقی اشتہارات یا پروپیگنڈے میں ہے، انہوں نے پاکستان کے عوام پر زور دیا کہ وہ ملک کو بحرانوں سے نکالنے کے لئے ان کی پارٹی کا ساتھ دیں۔
سابق وزیر اعظم نے یہ بھی کہا کہ پی ٹی آئی ملک کی واحد جماعت ہے جو اسے موجودہ بحرانوں سے نکال سکتی ہے۔ انہوں نے کہا کہ ہم نے اقتدار میں آنے کے بعد پاکستان کو بچانے کے لیے جنگی بنیادوں پر اقدامات پر غور کرنا شروع کر دیا ہے۔
انہوں نے اس بات کا اعادہ کیا کہ اگر پولیٹیکل انجینئرنگ کی گئی تو شفاف انتخابات نہیں ہوں گے۔ انہوں نے کہا کہ خیبر پختونخوا میں پاکستان تحریک انصاف (پی ٹی آئی) کو کمزور کرنے کی کوششیں کی جا رہی ہیں، عوام کی مرضی کے خلاف بننے والی حکومت ملک کو درپیش بڑے مسائل حل نہیں کر سکے گی۔
