لاہور ہائی کورٹ نے چیئرمین پی ٹی آئی عمران خان کے خلاف درج 121 مقدمات کی کارروائی روکنے کی درخواست سماعت کے لیے مقرر کردی۔
جسٹس علی باقر نجفی کی سربراہی میں پانچ رکنی بینچ پیر کو کیس کی سماعت کرے گا۔
عدالت نے 8 مئی کو کیسز کی تحقیقات پر رپورٹ طلب کرلی ہے، جبکہ 5 رکنی بینچ نے عمران خان کو تحقیقات میں شامل ہونے کا حکم دیا ہے۔
عدالت کے رجسٹرار آفس نے عمران خان کی درخواست پر سماعت کی کاز لسٹ جاری کردی، بینچ میں جسٹس عالیہ نیلم، جسٹس طارق سلیم، جسٹس انوار الحق اور جسٹس امجد رفیق شامل ہیں۔
واضح رہے کہ سابق وزیراعظم نے اپنے خلاف درج 121 مقدمات کو خارج کرنے کے لیے لاہور ہائی کورٹ سے رجوع کیا تھا۔
درخواست میں سیکریٹری داخلہ، وزارت قانون، وزارت دفاع، سیکریٹری کابینہ ڈویژن، چیف سیکریٹری، پنجاب پولیس کے سربراہ، محکمہ اینٹی کرپشن، نیب، ایف آئی اے، وزیراعظم شہباز شریف، پیمرا اور الیکشن کمیشن کو فریق بنایا گیا ہے۔
درخواست میں کہا گیا ہے کہ عمران خان کے خلاف کوئٹہ، کراچی، اسلام آباد اور لاہور میں 121 ایف آئی آردرج کی گئی ہیں۔
پی ٹی آئی کے حامیوں کو حراست میں لے کر گرفتار کیا جا رہا ہے، نگران پنجاب حکومت انتقامی کارروائیاں کر رہی ہے۔
تحریک انصاف کے سربراہ نے درخواست کی ہے کہ ان کی درخواست پر فیصلہ آنے تک تمام مقدمات میں کارروائی روکنے کا حکم جاری کیا جائے، پہلے سے درج مقدمات میں تادیبی کارروائی کی جائے اور دہشت گردی کے مقدمات میں بغیر نوٹس کے فوجداری کارروائی کی جائے۔
