اسلام آباد: وفاقی حکومت نے چیف جسٹس آف پاکستان کے اختیارات میں کمی سے متعلق بل پر غور کیلئے 10 اپریل کو دونوں ایوانوں کا مشترکہ اجلاس طلب کرلیا۔
اگر سپریم کورٹ (پریکٹس اینڈ پروسیجر) بل 2023 کو پارلیمنٹ کے مشترکہ اجلاس میں اکثریت سے منظور کر لیا جاتا ہے تو اسے منظوری کے لیے دوبارہ صدر کے سامنے پیش کیا جائے گا۔
اگر صدر 10 دن کے اندر اس کی منظوری نہیں دیتے ہیں، تو یہ سمجھا جاتا ہے کہ منظوری دے دی گئی ہے.
قبل ازیں صدر مملکت ڈاکٹر عارف علوی نے عدالتی اصلاحات بل پر دستخط کرنے سے انکار کرتے ہوئے کہا تھا کہ یہ قانون بادی النظر میں پارلیمنٹ کی اہلیت سے باہر ہے اور اسے رنگین قانون قرار دیا جا سکتا ہے۔
یہ پیش رفت اس وقت سامنے آئی جب پنجاب اور خیبر پختونخوا میں قبل از وقت انتخابات کے حوالے سے حکومت اور سپریم کورٹ کے درمیان تعطل کے دوران یہ بل قومی اسمبلی اور سینیٹ سے منظور ہونے کے بعد منظوری کے لیے ان کے پاس بھیجا گیا۔
صدر مملکت نے آئین کے آرٹیکل 67 اور آرٹیکل 191 کا بھی حوالہ دیا جو پارلیمنٹ اور سپریم کورٹ آف پاکستان کی حدود کا تعین کرتا ہے۔
انہوں نے کہا کہ سپریم کورٹ ایک آزاد ادارہ ہے، جیسا کہ بانیان پاکستان نے تصور کیا تھا کہ ریاست پاکستان میں عدلیہ کی آزادی مکمل طور پر محفوظ ہوگی۔
اس مقصد کو مدنظر رکھتے ہوئے آرٹیکل 191 کو شامل کیا گیا اور سپریم کورٹ کو پارلیمنٹ کے قانون سازی کے اختیار سے باہر رکھا گیا۔
انہوں نے اس بات پر روشنی ڈالی کہ قانون بنانے کی پارلیمنٹ کی اہلیت آئین سے ہی پیدا ہوتی ہے۔
