پروڈیوسر رتیش سدھوانی کی جانب سے حال ہی میں تصدیق کی گئی ہے کہ شاہ رخ خان کی ایکشن تھرلر فلم ‘ڈان’ کی تیسری قسط پر کام جاری ہے۔
اگرچہ فلم کے اسکرپٹ پر پروڈیوسر اور ہدایت کار فرحان اختر ابھی کام کر رہے ہیں، لیکن افواہیں ہیں کہ شاہ رخ خان ڈان 3 میں نظر نہیں آئیں گے۔
ایک معروف خبر رساں ادارے کی حالیہ رپورٹس کے مطابق شاہ رخ خان کا ‘ڈان’ کا کردار نبھانے کے لیے رنویر سنگھ اور کچھ دیگر اداکاروں کے درمیان مقابلہ تھا, ذرائع کے مطابق رنویر ڈان 3 میں ٹائٹل رول ادا کریں گے۔
شاہ رخ کے جانے کے بعد، ڈان 3 کے میکرز نے ایک مثالی متبادل کی تلاش کی جو ڈان کی وراثت کو آگے بڑھا سکے اور اس کے ساتھ انصاف کرسکے۔
رنویر ہمیشہ ایکسل انٹرٹینمنٹ کے پسندیدہ رہے ہیں اور ان کی متعدد بلاک بسٹر فلموں میں کام کر چکے ہیں، جن میں دل دھڑکنے دو اور گلی بوائے شامل ہیں۔
رنویر، جو پہلے ہی پروموشنل ویڈیو کی شوٹنگ کر چکے ہیں، مبینہ طور پر ڈان 3 کے اعلان میں شامل ہوں گے۔
ذرائع کے مطابق رنویر نئے ڈان کا عہدہ سنبھالیں گے اور شاہ رخ خان کو بھی اس بارے میں بتایا جا چکا ہے۔
پہلی فلم 2006 میں ریلیز ہوئی تھی جبکہ دوسری قسط 2011 میں ریلیز ہوئی تھی جس میں شاہ رخ خان اور پریانکا چوپڑا جونس نے اپنے کرداروں کو دوبارہ ادا کیا تھا۔ دونوں فلموں کی ہدایتکاری فرحان اختر نے کی تھی۔
