گریز (ہیلتھ ڈیسک): آسٹریا میں ایک نیورو سرجن اس وقت زیر تفتیش ہے جس پر الزام ہے کہ اس نے اپنی 13 سالہ بیٹی کو دماغی آپریشن کے دوران مریض کی کھوپڑی میں سوراخ کرنے کی اجازت دی۔میڈیا رپورٹس کے مطابق ایک 33 سالہ شخص کو جنگل میں پیش آئے ایک سنگین حادثے میں سر میں شدید چوٹ آئی جس کے بعد اسے آسٹریا کے شہر گریز کے یونیورسٹی ہسپتال گریز لے جانا پڑا۔
تاہم جب آپریشن روم میں لے جایا گیا تو ڈیوٹی پر موجود خاتون نیورو سرجن، جن کا نام پرائیویسی کی وجہ سے ظاہر نہیں کیا گیا، نے آپریشن تھیٹر میں اپنی 13 سالہ بیٹی سے بے ہوش مریض کی کھوپڑی میں سوراخ کروایا۔
خوش قسمتی سے آپریشن کامیاب رہا اور زخمی شخص صحتیاب ہوگیا۔ آپریشن روم کے باہر کسی کو بھی اس طریقہ کار میں لڑکی کے فعال کردار کے بارے میں علم نہیں تھا۔
تاہم جولائی میں گریز میں پبلک پراسیکیوٹر کے دفتر میں ایک نامعلوم شخص کی جانب سے مذکورہ بالا آپریشن میں نابالغ لڑکی کے ملوث ہونے کی شکایت درج کرائی گئی تھی۔
