انٹرنیشنل کرکٹ کونسل (آئی سی سی) نے آئی سی سی ورلڈ کپ 2023 میں نیدرلینڈز کے خلاف پاکستان کے پہلے میچ کی کوریج سے پاکستانی صحافیوں کی راہ میں حائل ویزا کے مسئلے کو حل کرنے کے لیے قدم اٹھایا ہے۔
پاکستان کرکٹ بورڈ (پی سی بی) نے اس سے قبل صحافیوں کو بھارتی ویزے دینے سے انکار پر مایوسی کا اظہار کیا تھا جس کی وجہ سے ان کی کرکٹ ایونٹ کی جامع کوریج کی صلاحیت خطرے میں پڑ گئی تھی۔
بڑھتے ہوئے خدشات کے جواب میں آئی سی سی کے ترجمان نے صورتحال کی سنگینی کو تسلیم کیا اور یقین دلایا کہ معاملے کو فوری طور پر حل کرنے کی ہر ممکن کوشش کی جارہی ہے۔
یہ ہمارے میزبان کی ذمہ داری ہے اور وہ ہماری مکمل حمایت کے ساتھ اس پر سخت محنت کر رہے ہیں۔ آئی سی سی کے ترجمان کا کہنا ہے کہ اس مسئلے کو حل کرنے کے لیے ہر ممکن کوشش کی جا رہی ہے۔
پی سی بی نے آئی سی سی کو باضابطہ مراسلے میں کھیلوں کے مقابلوں کے جوش و خروش میں اضافے میں صحافیوں اور شائقین کے اہم کردار پر روشنی ڈالی۔
بورڈ نے گہری تشویش اور مایوسی کا اظہار کرتے ہوئے پاکستانی صحافیوں اور شائقین کو بھارتی ویزے کے حصول میں درپیش چیلنجز پر روشنی ڈالی جس سے ان کی اہم میچوں میں شرکت اور کوریج کی صلاحیت متاثر ہو رہی ہے۔
انہوں نے کہا کہ ہمیں یہ دیکھ کر مایوسی ہوئی ہے کہ پاکستانی صحافی اور شائقین آئی سی سی ورلڈ کپ میں پاکستان کے افتتاحی میچ کی کوریج کے لیے بھارتی ویزا حاصل کرنے کے بارے میں غیر یقینی کا شکار ہیں، یہ غیر یقینی صورتحال ہم پر کافی دباؤ ڈال رہی ہے۔
پی سی بی کی جانب سے آئی سی سی کو لکھے گئے خط میں کہا گیا ہے کہ ہم کھیلوں کے ایونٹس کے جذبے اور ماحول کو بہتر بنانے میں صحافیوں اور پرجوش شائقین کے اہم کردار کو مکمل طور پر تسلیم کرتے ہیں۔
پی سی بی کے خط میں مزید کہا گیا ہے کہ ہم گزشتہ تین سال سے آئی سی سی کو ان کی ذمہ داریوں اور شائقین اور صحافیوں کو ویزے جاری کرنے کے معاہدے سے آگاہ کر رہے ہیں اور تمام متعلقہ حکام کے ساتھ تحفظات کا اظہار کرتے رہے ہیں۔
